ကိုးရီးယားရဲ့နာမည်ကျော်ကားကုမ္ပဏီတစ်ခုဖြစ်တဲ့ဟွန်ဒိုင်းဟာ လာမယ့်၂၀၂၀နဲ့၂၀၂၅ခုနှစ်ကြားမှာ ဒေါ်လာ၅၂ဘီလီယံကျော်တန်ကြေးရှိတဲ့ ရင်းနှီးမြှုပ်နံှမှုများပြုလုပ်သွားမှာဖြစ်ကြောင်း သိရပါတယ်။

အဆိုပါရင်းနှီးမြှုပ်နှံမှုစုစုပေါင်းရဲ့ သုံးပုံတစ်ပုံကိုတော့ လျှပ်စစ်ကားနဲ့ မောင်းသူမဲ့ကားစီမံကိန်းများမှာ သုံးစွဲသွားမှာဖြစ်တယ်လို့ ပြောရေးဆိုခွင့်ရှိသူတစ်ဦးက ရိုက်တာသတင်းဌာနကိုပြောကြားခဲ့ပါတယ်။

ဟွန်ဒိုင်းကုမ္ပဏီဟာ လာမယ့်၂၀၂၀ပြည့်နှစ်ကစလို့ တစ်နှစ်ကို ပျမ်းမျှဒေါ်လာ၈ဘီလီယံကျော်ရင်းနှီးမြှုပ်နှံသွားမှာဖြစ်ပြီး ဒါဟာ ပြီးခဲ့တဲ့၂၀၁၈ခုနှစ်ကထက်စာရင် နှစ်စဉ်ရင်းနှီးမြှုပ်နံှမှုပမာဏ ဒေါ်လာ၃ဘီလီယံကျော် ပိုမိုများပြားလာခဲ့တာလည်းဖြစ်ပါတယ်။

အဆိုပါရင်းနှီးမြှုပ်နှံမှုစုစုပေါင်းထဲက ဒေါ်လာ၁၆ဘီလီယံကျော်ကိုတော့ အနာဂတ်အတွက် နည်းပညာသစ်စီမံကိန်းများမှာ ရင်းနှီးမြှုပ်နှံသွားမှာဖြစ်ကြောင်းသိရပါတယ်။

၂၀၂၅ခုနှစ်မတိုင်မီ ကမ္ဘာ့ကားဈေးကွက်ရဲ့ လျှပ်စစ်ကားထုတ်လုပ်မှုအများဆုံးကုမ္ပဏီ၃ခုစာရင်းထဲမှာ ပါဝင်လာနိုင်ဖို့ ဟွန်ဒိုင်းကုမ္ပဏီက ရည်မှန်းထားတယ်လို့ဆိုပါတယ်။ အဆိုပါရည်မှန်းချက်အတိုင်း ပြည့်မီနိုင်ဖို့အတွက် တစ်နှစ်ပျမ်းမျှ လျှပ်စစ်ကားခြောက်သိန်းကျော် နှစ်စဉ်ရောင်းချရဖို့ လိုအပ်နေခဲ့တာလည်းဖြစ်ပါတယ်။

အဆိုပါရင်းနှီးမြှုပ်နှံမှုသတင်းကို တရားဝင်ထုတ်ပြန်ကြေညာခဲ့ပြီးနောက်မှာတော့ ဟွန်ဒိုင်းကုမ္ပဏီရဲ့ရှယ်ယာတွေဟာ ၂%လောက်ချက်ချင်းဈေးတက်သွားတယ်လို့လည်း ရိုက်တာသတင်းဌာနက ဖော်ပြသွားခဲ့ပါတယ်။

နာမည်ကျော်Fordကားကုမ္ပဏီဟာ တရုတ်ဈေးကွက်အတွင်းမှာ ဈေးကွက်ဝေစုအခိုင်အမာရရှိဖို့အတွက် ရုန်းကန်နေရတာ ဆယ်စုနှစ်တစ်ခုနီးပါးရှိလာခဲ့ပြီဖြစ်ပါတယ်။ ကမ္ဘာ့အကြီးမားဆုံးကားဈေးကွက်တစ်ခုဖြစ်တဲ့ တရုတ်ဈေးကွက်မှာတော့ ဒိတ်ဒိတ်ကြဲကားကုမ္ပဏီကြီး၃ခုလောက်က အပြိုင်ဖြစ်နေခဲ့တာပါ။

အမေရိကန်ရဲ့ နံပါတ်တစ်ကားကုမ္ပဏီလို့ပြောရမယ့် General Motorsဟာ တရုတ်ဈေးကွက်မှာလည်း ရောင်းအားအကောင်းဆုံးအဖြစ် ရပ်တည်လျက်ရှိနေပါတယ်။ Fordကုမ္ပဏီက ဒုတိယနေရာမှာရှိနေပြီး သူ့ရဲ့နောက်မှာတော့ Fiatကုမ္ပဏီဖြစ်ပါတယ်။

၂၀၀၈ခုနှစ်နောက်ပိုင်းမှာတော့ Fordကုမ္ပဏီဟာ တရုတ်ရဲ့ဈေးကွက်အတွင်း ဈေးကွက်ဝေစုပမာဏဟာ ၅%မကျော်ခဲ့ပါဘူး။ နောက်ပိုင်းနှစ်အနည်းငယ်အတွင်းမှာ ပိုမိုကျဆင်းလာခဲ့ပြီး ၂၀၁၅ခုနှစ်မှာ ၄.၇%ရှိခဲ့ရာကနေ ၂၀၁၈ခုနှစ်မှာတော့ ၂.၉%ထိရောက်သွားခဲ့တာဖြစ်ပါတယ်။

ဒါပေမယ့် အခုလိုရောင်းအားကျဆင်းနေတာ Fordကုမ္ပဏီတစ်ခုထဲတော့မဟုတ်ပါဘူး။ တရုတ်ရဲ့ကားဈေးကွက်တစ်ခုလုံးက သိသိသာသာအကျဖက်ကိုရောက်နေခဲ့တာဖြစ်ပါတယ်။ ဒါကြောင့် ကားကုမ္ပဏီကြီးတွေဟာ အပြိုင်အဆိုင်ဈေးလျှော့ပြီး ရောင်းအားကို ပြန်လည်မြှင့်တင်နိုင်ဖို့ အသီးသီးကြိုးစားနေရပါတယ်။ General Motorsကုမ္ပဏီဆိုရင် ၂၀၁၈ခုနှစ်အတွင်းမှာ ဈေးကွက်ဝေစု ၁၃.၈%ရရှိထားပေမယ့် သူလည်း ၂၀၁၅နောက်ပိုင်းမှာ ဆက်တိုက်ရောင်းအားကျဆင်းလာမှုကို မရှောင်လွှဲနိုင်ခဲ့ပါဘူး။

အခုလိုစံချိန်တင်ရောင်းအားကျဆင်းမှုတွေကို ရပ်တန့်နိုင်ဖို့အတွက် Fordကုမ္ပဏီဟာ ရင်းနှီးမြှုပ်နှံမှုတွေထပ်မံပြုလုပ်ပြီးတရုတ်ဈေးကွက်အတွက်သီးသန့်ထုတ်လုပ်ထားတဲ့ကားတွေရဲ့အရည်အသွေးကို မြှင့်တင်ဖို့ကြိုးစားနေပါတယ်။ ဒါ့အပြင် တရုတ်ပြည်တွင်းမှာတည်ထောင်ထားတဲ့ ချန်အန်းဖို့ဒ်စက်ရုံက ကားနဲ့ဆက်စပ်ပစ္စည်းတွေကို အာရှ-ပစိဖိတ်ဈေးကွက်အတွက်သာလျှင်မက ကမ္ဘာတလွှားမှာအသုံးပြုနိုင်အောင် ပြောင်းလဲထုတ်လုပ်ဖို့ စီစဉ်နေတယ်လို့ဆိုပါတယ်။