![](https://yigmm.com/wp-content/uploads/2020/12/7.jpg)
![](https://yigmm.com/wp-content/uploads/2020/12/7-624x418.jpg)
Agent Award 2020
![](https://yigmm.com/wp-content/uploads/2020/12/7.jpg)
မန္တလေးတိုင်းဒေသကြီး အစိုးရအဖွဲ့မှ ကြီးမှူး၍ မြန်မာပြည်သူပြည်သားများနှင့် ထိုင်းနိုင်ငံ ဓမ္မကာယဖောင်ဒေးရှင်းတို့ မှ ဆွမ်းဆန်စိမ်းလောင်းလှူပွဲကို မန္တလေးတိုင်းဒေသကြီး အတွင်း ကျင်းပပြုလုပ်ခဲ့ကြသည်….
ထိုဆွမ်းဆန်စိမ်းလောင်းလှူပွဲကြီးမှာ သံဃာအပါး ၃၀၀၀၀ ကြွရောက်ခဲ့ကြပြီး Young Investment Group Industry Co.,Ltd နှင့် Young Insurance Co.,Ltd တို့မှ ပူးပေါင်းပါဝင်လှူဒါန်းခဲ့ပါတယ်..
လှူဒါန်းမှု အစုစုကို (၇) ရက်သားသမီးအပေါင်း ကုသိုလ်ပွားလို့ သာဓုအနုမောဒနာ ခေါ်နိုင်ပါစေရန် အခမ်းအနားမြင်ကွင်းများကို မှတ်တမ်းတင်ဖော်ပြလိုက်ရပါတယ်။
ဒင်းန်တေလာဟာ နှစ်ပေါင်း၂၀ကျော်အတွင်းမှာ ကုမ္ပဏီ၈ခုကို အောင်မြင်စွာတည်ထောင်နိုင်ခဲ့တဲ့ ဝိုင်လုပ်ငန်းရှင်တစ်ဦးဖြစ်ပြီး လက်ရှိမှာတော့ Digital Wine Venturesကုမ္ပဏီရဲ့ CEOအဖြစ် တာဝန်ယူဆောင်ရွက်လျက်ရှိနေပါတယ်။ လုပ်ငန်းတစ်ခုအောင်မြင်တိုးတက်ဖို့အတွက် လုပ်ဆောင်ရမယ့်အချက်များကို သူ့ရဲ့နှစ်၂၀ကျော်အတွေ့အကြုံအပေါ် အခြေခံပြီး ဒင်းန်တေလာက CEOမဂ္ဂဇင်းနဲ့အင်တာဗျူးမှာ အခုလိုပြောပြပေးခဲ့ပါတယ်။
၁။ လုပ်ငန်းချည်းသက်သက်မထောင်ပါနဲ့ ၊ သင့်ရဲ့စိတ်အားထက်သန်မှုကို ပူးတွဲတည်ထောင်ပါ။
သင့်အနေနဲ့ လုပ်ငန်းတစ်ခုကို စတင်တော့မယ်ဆိုရင် သင်ကိုယ်တိုင် စိတ်အားထက်သန်မှုအရှိဆုံး စိတ်ကူးစိတ်သန်းတွေနဲ့ပဲ လုပ်ငန်းကို တည်ဆောက်သင့်ပါတယ်။ ဘယ်လိုလုပ်ငန်းမျိုးပဲမဆို အသက်ရှူကြပ်စရာ အခက်အခဲတွေဟာ ကြုံလာတတ်စမြဲမို့ ကိုယ်ကိုယ်တိုင် ဆန္ဒပြင်းပြတဲ့၊ ဝါသနာကြီးမားတဲ့လုပ်ငန်းမျိုးကိုသာ ရွေးချယ်သင့်ပါတယ်။
၂။ ကြိုတင်စီမံပါ။
သင့်ရဲ့လုပ်ငန်းက ဘယ်ကိုဦးတည်နေတယ်ဆိုတာ ရှင်းလင်းသေချာဖို့အတွက် တိကျတဲ့Planတွေရှိနေဖို့လိုပါတယ်။ လာမယ့်တစ်နှစ် ၊ နှစ်နှစ် ၊ ငါးနှစ်အတွင်းမှာ သင့်လုပ်ငန်း ဘယ်လောက်ထိတိုးတက်အောင်မြင်ရမယ်ဆိုတာမျိုးကို လက်တွေ့ကျကျPlanဆွဲထားရမှာဖြစ်ပါတယ်။ လုပ်ငန်းလည်ပတ်ဖို့၊ ချဲ့ထွင်ဖို့ လိုအပ်တဲ့ကုန်ကျစရိတ်တွေကို ထည့်သွင်းတွက်ချက်ထားရမှာဖြစ်သလို မထင်မှတ်တဲ့အပြောင်းအလဲတွေဖြစ်လာခဲ့ရင် အထိအခိုက်နည်းနိုင်သမျှနည်းဖို့ကိုလည်း ပြင်ဆင်ထားဖို့လိုအပ်ပါတယ်။ ရေတိုရေရှည်စီမံကိန်းတွေ အခိုင်အမာရှိနေခြင်းအားဖြင့် ဝန်ထမ်းတွေရဲ့ယုံကြည်မှုကိုလည်း ရရှိနိုင်မှာဖြစ်ပြီး ဝန်ထမ်းကောင်းတွေ သင့်ဆီရောက်ာဖို့ အခွင့်အလမ်းပိုများနိုင်ပါတယ်။
၃။ စားသုံးသူကို အမြဲတမ်းဂရုစိုက်ပါ။
စီးပွားရေးမှာ အရိုးရှင်းဆုံးသော သဘောတရားတစ်ရပ်ဖြစ်ပေမယ့် အတော်များများကတော့ လိုက်နာဖို့ပျက်ကွက်လေ့ရှိပါတယ်။ စားသံုံးသူရဲ့စိတ်ကျေနပ်မှုကို အပြည့်အဝရရှိတဲ့လုပ်ငန်းတွေသာ ရေရှည်အကျိုးအမြတ်ရရှိနိုင်မှာဖြစ်တာကြောင့် အထူးဂရုစိုက်ဖို့အရေးကြီးပါတယ်။
၄။ နည်းပညာ
ယနေ့ခေတ်ဟာ နည်းပညာခေတ်ဖြစ်တာကြောင့် သင့်ရဲ့လုပ်ငန်းမှာလည်း ဒါတွေကို အံဝင်ခွင်ကျအသုံးချဖို့ ကြိုးစားရမှာဖြစ်ပါတယ်။ နည်းပညာပိုင်းမှာ ခေတ်နောက်ကျနေတဲ့ လုပ်ငန်းတစ်ခုဟာ ရေရှည်ရပ်တည်နိုင်ဖို့ခက်ပါတယ်။
၅။ လုပ်ငန်းခွင်ပျော်ရွှင်မှု
သင့်ရဲ့ဝန်ထမ်းတွေ အလုပ်လုပ်ရတာပျော်ရွှင်စိတ်ချမ်းသာအောင် ဖန်တီးပေးနိုင်ဖို့အရေးကြီးပါတယ်။ ဝန်ထမ်းတွေ ပျော်ပျော်ရွှင်ရွှင်အလုပ်လုပ်နေမှသာ လုပ်ငန်းပိုမိုတိုးတက်မှာဖြစ်သလို စားသုံးသူတွေရဲ့စိတ်ကျေနပ်မှုကို ရရှိနိုင်မှာပါ။ ဒါ့အပြင် ကိုယ့်အလုပ်မှာဝန်ထမ်းမြဲဖို့လည်း လုပ်ငန်းခွင်ပျော်ရွှင်မှုက အရေးကြီးပါတယ်။
၆။ အပြောင်းအလဲ = အခွင့်အလမ်း
လူအများစုက အပြောင်းအလဲကို စိုးရွံ့လေ့ရှိပါတယ်။ စီးပွားရေးနယ်ပယ်မှာတော့ အပြောင်းအလဲဆိုတာ အခွင့်အလမ်းပဲဖြစ်တာမို့ လိုအပ်တဲ့အပြောင်းအလဲတွေကို စနစ်တကျပြင်ဆင်လုပ်ဆောင်သင့်ပါတယ်။
နာမည်ကျော်ကားကုမ္ပဏီTeslaရဲ့ တရုတ်အခြေစိုက်စက်ရုံကထုတ်လုပ်တဲ့ Model 3လျှပ်စစ်ကားများအတွက် တရုတ်အစိုးရက ထောက်ပံ့ကြေးပေးအပ်သွားမှာဖြစ်တယ်လို့ တာဝန်ရှိသူတစ်ဦးက ရိုက်တာသတင်းဌာနကို အတည်ပြုပြောကြားခဲ့ပါတယ်။ ဒါဟာ အမေရိကန်ကားကုမ္ပဏီကြီးတွေ တရုတ်ဈေးကွက်မှာ ပိုမိုရင်းနှီးမြှုပ်နှံလာဖို့အတွက် တရုတ်အစိုးရရဲ့ကြိုးပမ်းမှုတစ်ရပ်ဖြစ်တယ်လို့လည်း ကျွမ်းကျင်သူတွေက သုံးသပ်ထားကြပါတယ်။
လျှပ်စစ် ဒါမှမဟုတ် ဟိုက်ဒရိုဂျင်လောင်စာသုံးယာဉ်ထုတ်လုပ်မှုတွေအတွက် အစိုးရထောက်ပံ့ကြေးကို စိစစ်ပေးအပ်သွားမှာဖြစ်ကြောင်း တရုတ်စက်မှုဝန်ကြီးဌာနက တရားဝင်ကြေညာချက်ထုတ်ပြန်ထားခဲ့တာဖြစ်ပါတယ်။ အဆိုပါအစိုးရထောက်ပံ့ကြေးကို လက်ခံရရှိခဲ့ပြီဖြစ်ကြောင်း Teslaက သောကြာနေ့နံနက်အစောပိုင်းမှာ ကြေညာခဲ့ပါတယ်။
Teslaရဲ့ ရှန်ဟိုင်းစက်ရုံကထုတ်လုပ်တဲ့ Tesla Model 3 လျှပ်စစ်ကားများကို အစိုးရထောက်ပံ့ကြေးများစွာ ပေးအပ်သွားမှာဖြစ်ကြောင်း တရုတ်စက်မှုဝန်ကြီးဌာနဝက်ဘ်ဆိုက်ကလည်း ဖော်ပြသွားခဲ့ပါတယ်။
အမေရိကန်နိုင်ငံ၊ ကယ်လီဖိုးနီးယားအခြေစိုက် Teslaကားကုမ္ပဏီဟာ သူတို့ရဲ့ရှန်ဟိုင်းစက်ရုံကနေ ၂၀၁၉နှစ်ကုန်ပိုင်းမှာ တစ်ပတ်ကို လျှပ်စစ်ကားအစီးတစ်ထောင်ထုတ်လုပ်ဖို့ရည်မှန်းထားပြီး အဆိုပါကားများကို တရုတ်နှစ်သစ်ကူးကာလဖြစ်တဲ့ ဇန်နဝါရီလ၂၅ရက်နေ့မတိုင်မီ ရောင်းချသွားဖို့လည်း စီစဉ်လျက်ရှိနေပါတယ်။
Tesla Model 3လျှပ်စစ်ကားများအတွက် ရရှိလာမယ့် ထောက်ပံ့ကြေးပမာဏကိုတော့ အတိအကျသတင်းထုတ်ပြန်ခြင်းမရှိပါဘူး။ တရုတ်ဈေးကွက်မှာ Model 3လျှပ်စစ်ကားတစ်စီးရဲ့တန်ကြေးကတော့ ၃၅၅,၈၀၀ယွမ် (အမေရိကန်ဒေါ်လာ ၅၀,၅၅၀)ဖြစ်ကြောင်း Teslaရဲ့ ဝက်ဘ်ဆိုက်မှာ ဖော်ပြထားတာတွေ့ရပါတယ်။
၂၀၁၈ခုနှစ်အတွင်း တရုတ်ဈေးကွက်မှာ ကားထုတ်လုပ်ရောင်းချမှုစုစုပေါင်းရဲ့ ၄.၆%ဟာ လျှပ်စစ်နဲ့ဟိုက်ဒရိုဂျင်လောင်စာသုံးကားတွေပဲဖြစ်ပါတယ်။ ဒီပမာဏကို လာမယ့် ၂၀၂၅ခုနှစ်မှာ ၂၅%ထိ တိုးတက်လာစေဖို့ တရုတ်အစိုးရကရည်မှန်းထားတယ်လို့ ရိုက်တာသတင်းဌာနက ဖော်ပြသွားခဲ့ပါတယ်။
အာရှ-ပစိဖိတ်ဒေသဟာ ပြီးခဲ့တဲ့ဆယ်စုနှစ်တစ်ခုအတွင်း အတိုးတက်ဆုံးဒေသတစ်ခုဖြစ်လာနေတယ်လို့ စစ်တမ်းတွေကဆိုပါတယ်။
ဒေသအလိုက်ရပ်တည်မှုမှာ အဆင့်၅နေရာမှာသာရှိနေသေးပေမယ့် တစ်ကမ္ဘာလုံးအတိုင်းအတာ ပျမ်းမျှတိုးတက်မှုပမာဏကို ကျော်ဖြတ်နိုင်ခဲ့သလို လက်တင်အမေရိကနဲ့ ကာရစ်ဘီယံဒေသတွေကို ကျော်ဖြတ်နိုင်မယ့်အလားအလာတွေလည်း ရှိနေခဲ့တာဖြစ်ပါတယ်။
အာရှ-ပစိဖိတ်ဒေသအတွင်းနိုင်ငံတိုင်းလိုလိုဟာ ဈေးကွက်နဲ့ Infrastructureပိုင်းမှာ သိသိသာသာတိုးတက်လာခဲ့တာတွေ့ရပါတယ်။ ဗီယက်နမ်နဲ့ကာဇက်စတန်တို့ဟာ ဆယ်စုနှစ်တစ်ခုအတွင်း လျှပ်စစ်စွမ်းအားကဏ္ဍမှာ အဆ၅၀ကျော်ထိ တိုးတက်လာခဲ့ပါတယ်။
ဒါ့အပြင် အာရှ-ပစိဖိတ်ဒေသတွင်း ၁၇နိုင်ငံလောက်ဟာ လုပ်ငန်းလုပ်ကိုင်ဆောင်ရွက်ရာမှာ လွယ်ကူလျင်မြန်ချောမွေ့စေနိုင်တဲ့ မူဝါဒတွေ၊ ဥပဒေချမှတ်မှုတွေ ပြုလုပ်ခဲ့ကြတာတွေ့ရပါတယ်။
အိန္ဒိယသမ္မတမိုဒီရဲ့ ကြိုးနီစနစ်ဖျက်သိမ်းရေးလှုပ်ရှားမှုဟာ မြင်သာထင်သာအရှိဆုံး ဥပမာတစ်ရပ်ဖြစ်သလို သက်ဆိုင်ရာလုပ်ငန်းတွေရဲ့ အစိုးရနဲ့ပူးပေါင်းဆောင်ရွက်မှုဟာ ၃ဆလောက်မြင့်တက်လာခဲ့ပါတယ်။
ဒေသတွင်းဆင်းရဲမွဲတေမှုကလည်း သိသိသာသာကျဆင်းလာခဲ့ပြီး ငတ်မွတ်ခေါင်းပါးမှု၊ သောက်သုံးရေရှားပါးမှုပြဿနာတွေလည်း လျော့နည်းလာခဲ့ပါတယ်။ ဗီယက်နမ်ပြည်သူသန်း၂၀ကျော်လောက်ဟာ ၂၀၀၉ခုနှစ်မှာ သောက်သုံးရေရှားပါးမှုပြဿနာနဲ့ ရင်ဆိုင်ခဲ့ရပေမယ့် အခု၂၀၁၉မှာတော့ ဒီပြဿနာကို လုံးဝဖြေရှင်းနိုင်ခဲ့ပြီဖြစ်ပါတယ်။ တိုင်းပြည်အတွင်း အလွန်အမင်းဆင်းရဲနွမ်းပါးသူအရေအတွက်ဟာ ၂၀၀၉ခုနှစ်မှာ ၂၀ရာခိုင်နှုန်းထိရှိခဲ့ပေမယ့်လည်း အခု၂၀၁၉ခုနှစ်မှာတော့ ၂%အထိကို ကျဆင်းလာခဲ့ပါတယ်။
ဒေသတွင်းနိုင်ငံအသီးသီးရဲ့တိုးတက်လာမှုတွေကြောင့် အာရှ-ပစိဖိတ်ဟာ ပြီးခဲ့တဲ့ဆယ်စုနှစ်တစ်ခုအတွင်း ကမ္ဘာ့တိုးတက်မှုအရှိဆုံးဒေသတစ်ခုအဖြစ် မှတ်တမ်းဝင်နေခဲ့တာဖြစ်ပါတယ်။
ဒီနေ့ခေတ်မှာတော့ ရင်းနှီးမြှုပ်နှံမှု(Investment)ဆိုတဲ့စကားလုံးက ရေပန်းစားလျက်ရှိနေပါတယ်။ တကယ်တော့ ကုမ္ပဏီတစ်ခု ၊ လုပ်ငန်းတစ်ခုတည်ထောင်မှမဟုတ်ဘဲ တစ်ဦးချင်း ဒါမှမဟုတ် မိသားစုအဆင့်လောက်မှာ အသုံးပြုလို့ရနိုင်တဲ့ ရင်းနှီးမြှုပ်နှံမှုသဘောတရားတွေလည်းရှိပါတယ်။ ဒါကြောင့် ရင်းနှီးမြှုပ်နှံမှုနဲ့ပတ်သက်တဲ့ အခြေခံအချက်တချို့ကို ဖော်ပြပေးလိုက်ပါတယ်။
၁။ Risk
စီးပွားရေးဆိုင်ရာ ရင်းနှီးမြှုပ်နှံမှုတိုင်းဟာ အနည်းနဲ့အများRiskယူရပါတယ်။ riskနည်းမယ်ဆိုရင် အကျိုးအမြတ်လည်းနည်းတတ်ပါတယ်။ ဒါဟာ ရင်းနှီးမြှုပ်နှံမှုရဲ့ အခြေခံသဘောတရားပါပဲ။ ဒါကြောင့် ရင်းနှီးမြှုပ်နှံဖို့ စဉ်းစားပြီဆိုရင် မိမိမှာပိုင်ဆိုင်ထားတာရဲ့ တစ်စိတ်တစ်ပိုင်းကိုသာ စဉ်းစားသင့်ပါတယ်။ ဒါမှသာ မမျှော်လင့်တဲ့ဆုံးရှူံးမှုတွေနဲ့ ကြုံတွေ့လာခဲ့ရင် ဆက်လက်ရပ်တည်နိုင်မှာဖြစ်ပါတယ်။
၂။ ရည်မှန်းချက်
ရင်းနှီးမြှုပ်နှံမှုဆိုတာ ပို့ဆောင်ဆက်သွယ်ရေးနဲ့ သဘောတရားချင်းဆင်တူပါတယ်။ ကိုယ်သွားချင်တဲ့နေရာပေါ်မူတည်ပြီး စက်ဘီးနဲ့သွားမလား ၊ ကားနဲ့သွားမလား ၊ လေယာဉ်စီးမလားဆိုတာကို ရွေးချယ်ရတာဖြစ်ပါတယ်။ တစ်နည်းအားဖြင့်ပြောရရင် သင့်ရဲ့ငွေကြေးရည်မှန်းချက်ပေါ်မူတည်ပြီး ဘယ်လိုရင်းနှီးမြှုပ်နှံမှုမျိုးကို ပြုလုပ်သင့်တယ်ဆိုတာ ဆုံးဖြတ်ရမှာဖြစ်ပါတယ်။
ဥပမာ - လာမယ့်နှစ် သင့်ရဲ့မင်္ဂလာဆောင်မှာ အသုံးပြုဖို့ ရည်စူးထားတဲ့ငွေကြေးမျိုးကို riskများတဲ့လုပ်ငန်းတွေမှာ သွားရောက်ရင်းနှီးမြှုပ်နှံတာမျိုးမလုပ်သင့်ပါဘူး။ ဒါဟာ အနီးအနားက စူပါမားကတ်တစ်ခုကို လေယာဉ်နဲ့သွားသလိုမျိုးပါပဲ။ မြန်ဆန်ပြီး စိတ်လှုပ်ရှားစရာကောင်းနိုင်ပေမယ့် riskလည်းများပါတယ်။ ဒါဟာ စက်ဘီးနဲ့ ဒါမှမဟုတ် ဘတ်စ်ကားနဲ့သွားရမယ့် ခရီးမျိုးသာလျှင်ဖြစ်ပါတယ်။ တစ်နည်းအားဖြင့် riskနည်းတဲ့ ရင်းနှီးမြှုပ်နှံမှုမျိုးမှာသာ အသုံးပြုသင့်ပါတယ်။
၃။ တခြားသူများကိုအတုခိုးခြင်း
လူတစ်ယောက်ချင်းစီမှာ ရင်းနှီးမြှုပ်နှံမှုနဲ့ပတ်သက်လို့ မတူညီတဲ့ရည်ရွယ်ချက်တွေ အသီးသီးရှိနိုင်ပါတယ်။ တခြားတစ်ယောက်ရဲ့ ရင်းနှီးမြှုပ်နှံမှုရည်ရွယ်ချက်ဟာ ကိုယ်နဲ့ထပ်တူကျနိုင်မှာမဟုတ်တာကြောင့် အတုခိုးလို့မရနိုင်ပါဘူး။
တကယ်တော့ လူတစ်ယောက်နဲ့အသင့်တော်ဆုံး ရင်းနှီးမြှုပ်နှံမှုဆိုတာ သူ့ရဲ့ရည်မှန်းချက်အပြင် တတ်နိုင်တဲ့ငွေကြေးပမာဏ ၊ အရှူံးခံနိုင်စွမ်း ၊ ရင်းနှီးမြှုပ်နှံမှုပိုင်းမှာကျွမ်းကျင်ပါးနပ်မှုနဲ့ အခြားအချက်တွေပေါ်မူတည်ပြီး ကွဲပြားသွားကြမှာဖြစ်ပါတယ်။
ကုမ္ပဏီသမိုင်းတလျှောက် ပထမဆုံးအကြိမ်အဖြစ် Carbon-freeအလူမီနီယံသတ္ထုများကို အများအပြားဝယ်ယူထားကြောင်း Appleက တရားဝင်သတင်းထုတ်ပြန်ခဲ့ပါတယ်။
အဆိုပါသတ္ထုများဟာ ဒီလအတွင်းမှာ Appleကုမ္ပဏီကို ရောက်ရှိလာမှာဖြစ်ပြီး နောက်လာမယ့် Appleထုတ်ကုန်များမှာ အသုံးပြုသွားဖို့ရှိတယ်လို့ ပြောရေးဆိုခွင့်ရှိသူတစ်ဦးက သတင်းထောက်များကို ပြောကြားခဲ့ပေမယ့် ဘယ်ထုတ်ကုန်တွေဖြစ်မလဲဆိုတာကိုတော့ အတိအကျဖြေကြားပေးဖို့ ငြင်းဆန်ခဲ့ပါတယ်။
အလူမီနီယံသတ္ထုထုတ်လုပ်မှုဖြစ်စဉ်မှာ ကာဗွန်ကို မှီခိုထားရတာဖြစ်ပါတယ်။ ကာဗွန်လျှပ်စစ်ငုတ်ကိုဖြတ်သန်းပြီး အနည်ကျအောင်ပြုလုပ်ရတဲ့ဖြစ်စဉ်မှာ လေထုထဲကို ကာဗွန်ဒိုင်အောက်ဆိုဒ်ဓာတ်ငွေ့တွေထုတ်လွှတ်ရတာကြောင့် သဘာဝပတ်ဝန်းကျင်ကို ထိခိုက်စေနိုင်တဲ့အတွက် နောက်ပိုင်းမှာ carbon-freeအလူမီနီယံက ပိုမိုတွင်ကျယ်လာခဲ့တာဖြစ်ပါတယ်။
Appleဟာ အလူမီနီယံသတ္ထုကို သူ့ရဲ့ထုတ်ကုန်အများစုမှာ ထည့်သွင်းအသုံးပြုခဲ့တာဖြစ်ပြီး ပြီးခဲ့တဲ့နှစ်ကဖြန့်ချိခဲ့တဲ့ Macbookတွေမှာတော့ recycledအလူမီနီယံကို အသုံးပြုခဲ့ပါတယ်။
အခု carbon-freeအလူမီနီယံများကို ဝယ်ယူအသုံးပြုခြင်းဟာ Appleရဲ့သဘာဝပတ်ဝန်းကျင်ထိန်းသိမ်းရေးမှာ တစ်ဖက်တစ်လမ်းကပါဝင်ပူးပေါင်းတဲ့ ခြေလှမ်းသစ်တစ်ရပ်ဖြစ်တယ်လို့လည်း လေ့လာသူတွေကဆိုပါတယ်။
Appleရဲ့ carbon-freeအလူမီနီယံဝယ်ယူမှုပမာဏကို အတိအကျသိရှိရခြင်းမရှိပေမယ့် တန်ဖိုးအလွန်များပြားမယ်လို့ ကျွမ်းကျင်သူတွေက ခန့်မှန်းထားကြောင်း ရိုက်တာသတင်းဌာနက ဖော်ပြသွားခဲ့ပါတယ်။
ငွေရေးကြေးရေးအရ တစ်စုံတစ်ရာမှီခိုစရာမလိုဘဲ လွတ်လပ်မှုရှိတာ ၊ ကိုယ်ကြိုးစားရင်ကြိုးစားသလောက် အကျိုးအမြတ်များနိုင်တာ ၊ ကိုယ့်ရဲ့စိတ်ကူးစိတ်သန်းတွေကို လွတ်လွတ်လပ်လပ်အကောင်အထည်ဖော်နိုင်တာ အစရှိတဲ့အားသာချက်တွေကြောင့် ကိုယ်ပိုင်လုပ်ငန်းလုပ်လိုသူတွေ များစွာရှိနေပါတယ်။ ဒါကြောင့် တစ်နိုင်တစ်ပိုင်လုပ်ငန်းလေးတွေကို နေရာတိုင်းလိုလိုမှာ တွေ့မြင်နေရတာ သိပ်တော့မထူးဆန်းလှပါဘူး။
ဒါပေမယ့် ကိုယ်ပိုင်လုပ်ငန်းထောင်လိုက်တိုင်း အောင်မြင်မယ်လို့တော့ အာမခံချက်ရှိမနေပါဘူး။ ဒီနှစ်အစောပိုင်းကပြုလုပ်ခဲ့တဲ့ သုတေသနစစ်တမ်းတစ်ရပ်အရ ကိုယ်ပိုင်လုပ်ငန်းတွေရဲ့ သုံးပုံနှစ်ပုံလောက်သာ စတင်တည်ထောင်ပြီး နှစ်နှစ်ကျော်အထိ ဆက်လက်ရှင်သန်နိုင်တယ်လု့ိဆိုပါတယ်။ ဒါဟာ အမေရိကန်လိုနိုင်ငံမျိုးကို အခြေပြုလေ့လာထားတဲ့ စစ်တမ်းတစ်ရပ်ဖြစ်ပြီး ကျွန်တော်တို့လို ဖွံ့ဖြိုးဆဲနိုင်ငံမျိုးမှာဆိုရင် တစ်ပိုင်တစ်နိုင်လုပ်ငန်းတွေရဲ့ ရှင်သန်မှုနှုန်းက ပိုမိုနည်းပါးနိုင်ပါတယ်။
ဒါကြောင့် ကိုယ်ပိုင်လုပ်ငန်းတည်ထောင်တယ်ဆိုတာ စွန့်စားရတဲ့ကိစ္စမျိုးပဲဖြစ်ပြီး မြတ်ချင်လို့လုပ်တာမှန်ပေမယ့် မတော်တဆရှူံးကောင်းရှူံးသွားနိုင်တဲ့အန္တရာယ်လည်းရှိပါတယ်။ ဘယ်လိုပဲဖြစ်ဖြစ် တိကျခိုင်မာတဲ့စည်းမျဉ်းစည်းကမ်းတွေနဲ့ စနစ်တကျတည်ထောင်သွားမယ်ဆိုရင်တော့ ကြိုတင်ကာကွယ်လို့ရနိုင်တဲ့ဆုံးရှူံးမှုတိုင်းကို ကာကွယ်နိုင်မှာအသေအချာပါပဲ။
ဒါကြောင့် အောင်မြင်တဲ့လုပ်ငန်းတစ်ခုကိုစတင်နိုင်ဖို့အတွက် မဖြစ်မနေပြင်ဆင်ထားရမယ့်အချက်တွေကို ဖော်ပြပေးလိုက်ပါတယ်။
၁။ ဈေးကွက်ကိုလေ့လာခြင်း
တစ်နိုင်တစ်ပိုင်လုပ်ငန်းတစ်ခုအနေနဲ့ ဈေးကွက်ထဲမှာရှင်သန်နိုင်ဖို့ဆိုရင် ဈေးကွက်ရဲ့ ပြဿနာတစ်ရပ်ကိုဖြေရှင်းပေးနိုင်တာ ၊ စားသုံးသူတွေရဲ့ လိုအပ်ချက် ၊ ဒါမှမဟုတ် လိုအင်ဆန္ဒကိုဖြည့်စွမ်းပေးနိုင်တာ အစရှိတဲ့တစ်ချက်ချက်ကို ပိုင်ဆိုင်ထားဖို့လိုပါတယ်။ ဒါတွေကိုသိနိုင်ဖို့အတွက် စားသုံးသူတွေနဲ့ ဈေးကွက်ကို ဂရုတစိုက်လေ့လာနေရမှာဖြစ်ပါတယ်။
၂။ စီမံကိန်းရေးဆွဲခြင်း
စီမံကိန်းလို့ပြောရင်တော့ အနည်းငယ်ကိန်းကြီးခန်းကြီးဖြစ်နိုင်ပါတယ်။ ဒါပေမယ့် သင့်ရဲ့စိတ်ကူးကို လက်တွေ့အကောင်အထည်ဖော်နိုင်ဖို့အတွက် လုပ်ငန်းစီမံကိန်းက မဖြစ်မနေလိုအပ်ပါတယ်။ သင့်လုပ်ငန်းရဲ့ အနာဂတ်ရည်မှန်းချက် ၊ အဲဒီကိုရောက်အောင်သွားဖို့အတွက် ရေတိုရေရှည်စီမံချက်တွေကို စနစ်တကျရေးဆွဲထားရမှာဖြစ်ပြီး လက်တွေ့ကျတဲ့ရည်မှန်းချက် ၊ စီမံချက်မျိုးဖြစ်ဖို့လည်း ဂရုစိုက်သင့်ပါတယ်။
၃။ ငွေကြေးစီမံခန့်ခွဲမှု
တစ်နိုင်တစ်ပိုင်လုပ်ငန်းဖြစ်တဲ့အတွက် မတည်ရင်းနှီးငွေက အရမ်းများမှာတော့မဟုတ်ပါဘူး။ ဒါပေမယ့် မဖြစ်မနေအသုံးပြုဖို့လိုအပ်တဲ့ အသုံးစရိတ်တွေ(ထွက်ငွေတွေ)ကို စနစ်တကျစီမံခန့်ခွဲနိုင်ဖို့အရေးကြီးပါတယ်။ ယေဘုယျအားဖြင့် လုပ်ငန်းတစ်ခုအနေနဲ့ စတင်ချိန် အနည်းဆုံး၆လလောက်သတ်မှတ်ထားသင့်ပြီး အဆိုပါကာလအတွင်း ဝင်ငွေကိုလုံးဝထည့်မစဉ်းစားဘဲ အသုံးစရိတ်ကိုသာ အကျိုးရှိရှိစီမံခန့်ခွဲရမှာဖြစ်ပါတယ်။
အသုံးစရိတ်လို့ဆိုတဲ့နေရာမှာ တစ်ကြိမ်တည်းသာအသုံးပြုရမယ့် အသုံးစရိတ်တွေနဲ့ အပတ်စဉ်(လစဉ်)အသုံးပြုရမယ့် အသုံးစရိတ်တွေဆိုပြီး နှစ်မျိုးနှစ်စားရှိနိုင်ပါတယ်။ လုပ်ငန်းလိုင်စင် ၊ ပါမစ် ၊ အာမခံကြေး ၊ လိုအပ်တဲ့စက်ပစ္စည်းကိရိယာတွေဟာ တစ်ကြိမ်တည်းသာအသုံးပြုရမယ့် အသုံးစရိတ်စာရင်းဝင်ပြီး ရုံးခန်းနဲ့တကွ အခြားသောငှါးရမ်းခတွေ ၊ ကြော်ငြာအသုံးစရိတ်တွေ ၊ ထုတ်လုပ်မှုကုန်ကျစရိတ်တွေ ၊ ဝန်ထမ်းလစာတွေကတော့ လစဉ်အသုံးစရိတ်ထဲပါဝင်နေမှာဖြစ်ပါတယ်။ လစဉ်အသုံးစရိတ်ထဲမှာ သင်ကိုယ်တိုင်ရဲ့လစာကိုလည်း ထည့်သွင်းထားဖို့လိုအပ်ပါတယ်။
၄။ ဝန်ထမ်းခန့်အပ်ခြင်း
လုပ်ငန်းလည်ပတ်နိုင်ဖို့အတွက် လိုအပ်တဲ့ကျွမ်းကျင်ဝန်ထမ်း ၊ အခြေခံဝန်ထမ်းတွေခန့်အပ်ရာမှာ သူတို့ရဲ့တာဝန်နဲ့ခံစားခွင့်တွေကို တိတိကျကျသတ်မှတ်ပေးထားဖို့လိုပါတယ်။ (ဝန်ထမ်းရွေးချယ်ခန့်အပ်ခြင်းကိုတော့ သီးသန့်ဆောင်းပါးတစ်ပုဒ်နဲ့ ထပ်မံတင်ဆက်ပေးသွားမှာဖြစ်ပါတယ်)
၅။ ကြော်ငြာ
လုပ်ငန်းစတင်လည်ပတ်နိုင်တဲ့အခြေအနေကိုရောက်လာပြီဆိုရင်တော့ မဖြစ်မနေလုပ်ရမှာက သင့်လုပ်ငန်းကိုကြော်ငြာဖို့ပါပဲ။ ဒီဖက်ခေတ်မှာ ကြော်ငြာခြင်းနဲ့ပတ်သက်လို့ နည်းစနစ်၊ နည်းဗျူဟာတွေ အမျိုးမျိုးရှိနေတာဖြစ်လို့ မိမိနဲ့သင့်တော်ရာကိုရွေးချယ်နိုင်ပါတယ်။ ကြော်ငြာအတွက် အသုံးစရိတ်ကို မနှမျောသင့်သလို ထိရောက်တဲ့ငွေကြေးကုန်ကျမှုမျိုးဖြစ်ဖို့လည်း သေချာစိစစ်သွားရမှာဖြစ်ပါတယ်။
Uberအနေနဲ့ အစားအသောက်Deliveryဝန်ဆောင်မှုအပြင် အခြားသောကဏ္ဍများကိုလည်း Deliveryပို့ဆောင်ပေးနိုင်အောင် တိုးချဲ့စီစဉ်သွားမှာဖြစ်မယ်လို့ CEOဖြစ်သူဒါရာကပြောကြားခဲ့ပါတယ်။
လွန်ခဲ့တဲ့၂နှစ်အတွင်းမှာ Uberရဲ့ အစားအသောက်Deliveryဝန်ဆောင်မှု အောင်မြင်လာခဲ့ပြီးနောက် အခြားသောလုပ်ငန်းများကိုလည်း Deliveryဝန်ဆောင်မှုပေးနိုင်အောင် တိုးချဲ့သွားတော့မှာဖြစ်တယ်လို့ ဒါရာကဆိုပါတယ်။
“ကျွန်တော်တို့အနေနဲ့ Deliveryဝန်ဆောင်မှုကို အစားအသောက်ကဏ္ဍတင်မကဘဲ အခြားသောလုပ်ငန်းနယ်ပယ်အသီးသီးအတွက် ထပ်မံတိုးချဲ့သွားဖို့ ပြင်ဆင်နေပါတယ်။ ဒါကို နယူးယောက်မြို့ကနေ စတင်သွားဖို့ရှိနေပြီး နယူးယောက်မြို့တွင်းက ခင်ဗျားလိုချင်တဲ့အရာမှန်သမျှ မရဘူးဆိုတာမရှိဘဲ ခင်ဗျားဆီအရောက်ပို့ဆောင်ပေးနိုင်ဖို့အထိ ကျွန်တော်တို့ရည်မှန်းထားပါတယ်။ မိနစ်၃၀အတွင်း အရောက်ပို့ပေးနိုင်ဖို့လည်း မျှော်လင့်နေပါတယ်”လို့ ဒါရာက သတင်းထောက်များကို ပြောကြားခဲ့ပါတယ်။
အဆိုပါဝန်ဆောင်မှုများကို ၂၀၂၀ခုနှစ်အတွင်း နယူးယောက်နဲ့တကွ အမေရိကန်မြို့များမှာ စတင်အသုံးပြုနိုင်မှာဖြစ်ပေမယ့် ကမ္ဘာ့နိုင်ငံအသီးသီးကို ဘယ်အချိန်လောက် စတင်ဖြန့်ကျက်သွားမယ်ဆိုတာကိုတော့ ဒါရာက အသေးစိတ်ပြောပြခဲ့ခြင်းမရှိပါဘူး။
Uberဟာ ပြီးခဲ့တဲ့အောက်တိုဘာလအတွင်းက ချီလီအခြေစိုက် အွန်လိုင်းကုန်စုံဆိုင်တစ်ခုဖြစ်တဲ့ Cornershopရဲ့ ရှယ်ယာအများစုကို ဝယ်ယူထားခဲ့ပါတယ်။ ဒါဟာ သူတို့ရဲ့Deliveryဝန်ဆောင်မှုကို စားသောက်ကုန်နဲ့ အိမ်သုံးကုန်များနယ်ပယ်အထိ ဈေးကွက်ချဲ့ထွင်မှုခြေလှမ်းတစ်ရပ်ဖြစ်နိုင်တယ်လို့ လေ့လာသူတွေက သုံးသပ်ထားကြပါတယ်။